Tarot Review: எதிர்காலத்தைச் சொல்லும் கார்டுகளும் அமானுஷ்யமும்! பயமுறுத்துகிறதா இந்த ஹாரர் சினிமா? | Tarot Movie Review: Template jump scares and cliches make this supernatural horror an average affair

எலீஸின் (லார்சன் தாம்சன்) பிறந்தநாளைக் கொண்டாட நண்பர்கள் சிலர் ஒரு வீட்டிற்குச் செல்கிறார்கள். அங்குக் கிடைக்கும் டாரோ அட்டைகளை வாசிக்கத் தொடங்குகிறார்கள். மற்றவரின் டாரோ அட்டையை வாசிக்கக்கூடாது என்ற விஷயத்தைத் தெரிந்து கொண்டே அதைத் தொடரவும் செய்கிறார்கள்.

அந்த டாரோ அட்டைகள் அதற்கு முன்பே சபிக்கப்பட்டிருக்கின்றன. சபிக்கப்பட்ட டாரோ அட்டைகளைப் பயன்படுத்துவதினால் அந்த நண்பர்கள் குழு திகில் நிறைந்த சூழல்களில் சிக்கிக் கொள்கிறார்கள். அந்த அமானுஷ்ய சூழலிலிருந்து எத்தனை நபர்கள் உயிருடன் தப்பினார்கள் என்பதுதான் இந்த ஹாரர் திரைப்படத்தின் கதை.

நண்பர்கள் குழுவிலிருக்கும் ஹாரியட் சிலேட்டர், லார்சென் தாம்சன், அடைன் ப்ராட்லி, நொவோகிராட்ஸ் ஆகிய நால்வரும் சூழலுக்கான பயத்தைக் கச்சிதமாக வெளிப்படுத்தியிருக்கிறார்கள். இதைத் தாண்டி ஜேக்கப் பாட்டலான் காமெடி வசனங்களில் வெளிப்படுத்த வேண்டிய பாவனைகளைச் சரியாகச் செய்து ரசிக்க வைக்கிறார். தமிழ் விளம்பரப் படங்களில் நடித்து பின்னர் வெப்சிரீஸ், படங்கள் என புரொமோஷன் வாங்கியிருக்கும் அவந்திகா வந்தனப்புவும் தன் நடிப்பால் கவனம் பெறுகிறார். திரையில் சிறிது நேரம் தோன்றினாலும் அடுத்தடுத்த காட்சிகளுக்கான பயத்தை முன்பே கடத்திவிடுகிறார் நடிகை ஆல்வென்.