Bigg Boss 7 Day 86: விசித்ராவின் தவறான பேச்சு; பூர்ணிமா செய்த செயல்; மோதலில் முயல் டாஸ்க்!|Bigg Boss 7 Day 86 Highlights

குழு மனப்பான்மையுடன் நடந்த போட்டி

முதல் சுற்று ஆரம்பித்தது. இதில் ஆட தேர்வானவர்கள், நிக்சன், விசித்ரா, பூர்ணிமா. நிக்சன் தினேஷை டார்கெட் செய்ய, பூர்ணிமாவோ முதலில் ரவீனாவை வீழ்த்துவதில் முனைப்பாக இருந்தார். அது வெற்றி பெற்றது. முயலைப் பறிகொடுத்ததால் ரவீனா முதல் சுற்றில் வெளியேற்றம். ‘எனக்கு கஷ்டமா இருக்கு’ என்பதையும் சிரித்துக் கொண்டே சொன்னார் ரவீனா.

விளையாட்டு இடைவெளியில் பூர்ணிமாவைப் பற்றி கன்னாபின்னாவென்று புறணி பேசிக் கொண்டிருந்தார் விஷ்ணு. “அடுத்த ரவுண்ட்ல நான் வந்தா முதல்ல நிக்சனை முடிச்சிடுவேன். பூர்ணிமா பயங்கர தந்திரம். மாயாவைத் தாண்டிடுவா போல. மாயாவாவது வெளிப்படையா முரண்படுவாங்க. ஜெயிச்சா கம்யூனிட்டிக்கு 50 லட்சம் தருவேன்னு ஏன் பொய்லாம் சொல்லி ஜெயிக்கணும்?” என்பது விஷ்ணுவின் அனத்தல்.

இரண்டாவது சுற்று ஆரம்பித்தது. “என்னைத்தான் டார்கெட் பண்ணுவாங்க’ என்று யூகித்தார் பூர்ணிமா. இதில் ஆடத் தேர்வானவர்கள் பூர்ணிமா, தினேஷ், விசித்ரா. முதலில் ஓடிய தினேஷ் நிக்சனின் கற்களைத் தூக்கினார். விசித்ராவிற்கு தினேஷை தோற்கடித்தால் போதும். எனவே அதை எடுத்தார். பூர்ணிமா மணியை டார்கெட் செய்தார். விசித்ரா மிகவும் சிரமப்பட்டு ஓடி ஓடி கற்களை காலி செய்து முயலை எடுத்துக் கொண்டு வருவதற்குள் பஸ்ஸர் அடித்து விட்டது. எனவே விசித்ரா அவுட். “முயலை அங்கயே வெச்சிருங்க” என்றார் பிக் பாஸ். எனில் விசித்ராவின் நோக்கம் நிறைவேறவில்லை.