சன் டிவியில் ஒளிபரப்பாகும் தொடர் `எதிர்நீச்சல்’.இந்தத் தொடரை சின்னத்திரை ரசிகர்கள் பலரும் கொண்டாடினர். இதில் `ஆதி குணசேகரன்’ கதாபாத்திரத்தில் நடித்திருந்த மாரிமுத்து அத்தனை இயல்பாய் நடித்து அனைவரையும் கவர்ந்தார்.
அவரது கர்ஜனை குரலுக்கும், அசாத்திய உடல்மொழிக்கும் ஏகப்பட்ட ரசிகர்கள். வில்லன் கதாபாத்திரமாக இருந்தவருக்கு இத்தனை வரவேற்பு கிடைக்குமா எனப் பலரையும் வியக்க வைத்தவர். சினிமா மீதுள்ள காதலால் இயக்குநர், நடிகர் என தனக்கான இடத்தைத் தக்க வைத்துக் கொள்ள ஓடிக் கொண்டிருந்தவருக்கு இந்தத் தொடர் மிகப்பெரிய அங்கீகாரத்தைக் கொடுத்தது. புகழின் உச்சியில் இருந்தவரை காலம் அழைத்துக் கொண்டது. அவர் மறைந்தாலும் இறுதியாக அவர் நடித்துக் கொடுத்திருந்த காட்சிகள் இதுவரையில் ஒளிபரப்பானது. அவரது குரலைக் கேட்க முடியாவிட்டாலும் அவரை திரையில் பார்த்து ஆறுதல் அடைந்து கொண்டார்கள் அவரது ரசிகர்கள்.
இந்நிலையில், ஆதி குணசேகரன் கதாபாத்திரத்தில் இனி யார் நடிக்கப் போகிறார்? என்கிற கேள்வி தான் எல்லா பக்கமும் எதிரொலித்துக் கொண்டிருந்தது.
இவர் நடித்தால் நன்றாக இருக்கும் என்று அவரவர் சாய்ஸ்களை சமூகவலைதள பக்கங்களில் தெரிவித்து வந்தனர். இடையில் வேலராமமூர்த்தி தான் நடிக்கப் போகிறார் என்கிற தகவல் கசிய அவரிடம் பேசியபோது, `நான் சினிமாவில் பிஸியா இருக்கேன்.. என்கிட்ட அந்தக் கதாபாத்திரத்திற்காக கேட்டது உண்மைதான்.. ஆனா, இன்னும் எந்த முடிவும் எடுக்கல!’ எனக் கூறியிருந்தார்.
இறுதியாக, அவர் நடித்துக் கொடுத்திருந்த சீன்கள் அத்தனையும் நிறைவடைந்த நிலையில் கண்டிப்பாக ரீ – ப்ளேஸ்மென்ட் இருக்கு என ஒரு பக்கம் கமென்ட் பதிவிட்டனர். ஆனால், எதிர்நீச்சல் சீரியல் ரசிகர்கள் அவர் இல்லாத இடத்தில் யாரையும் ஒப்பிட்டுப் பார்க்க முடியாது என்கிற கருத்தையும் தெரிவித்து வந்தனர்.
இதற்கெல்லாம் முற்றுப்புள்ளி வைக்கும் வகையில் கதையின் போக்கை மாற்றி அமைக்க இந்தத் தொடரின் இயக்குநர் திருச்செல்வம் முடிவெடுத்திருப்பதாகவும் தகவல்கள் வெளியாகியுள்ளன. சமீபத்தில் ஒளிபரப்பான எபிசோடில் ஆதி குணசேகரன் கதாபாத்திரம் வீட்டை விட்டு வெளியேறிவிட்டது போன்ற காட்சி இருந்தது. இந்நிலையில், ஆதி குணசேகரனுக்கு அண்ணன் ஒருவர் இருப்பதாக தற்போது கதையின் போக்கு நகர இருக்கிறது. இதன் மூலம் புது கேரக்டர் ஒன்று அறிமுகமாகி கதைக்களம் அவரைச் சுற்றி நகரும் என்றும் எதிர்பார்க்கப்படுகிறது. ஆகவே, தற்காலிகமாக அடுத்த குணசேகரன் யார் என்கிற ரசிகர்கள் கேள்விக்கு முற்றுப்புள்ளி வைத்திருக்கிறார் இயக்குனர் திருச்செல்வம்.
+ There are no comments
Add yours