`ஆஸ்பத்திரிக்குப் போறதுக்கு முன்னாடி எனக்கு மெசேஜ் அனுப்பியிருந்தார்’- சேஷூ குறித்து கார்த்திக் யோகி

கடந்த சில நாள்களாக மருத்துவமனையில் சிகிச்சை பெற்று வந்த சேஷூ, 10 நாள்களாக வென்டிலேட்டர் உதவியுடன் சிகிச்சை பெற்றுவந்த நிலையில் இன்று மரணமடைந்திருக்கிறார்.

சமீபத்தில் வெளியான ‘வடக்குப்பட்டி ராமசாமி’ படத்தில் கோவில் பூசாரியாக பரதநாட்டியம் ஆடிக் கலக்கியிருப்பார். அவரது காமெடி பரதநாட்டியம் வைரலானது. மறைந்த சேஷூவின் நினைவுகள் குறித்து கனத்த இதயத்துடன் இங்கே பகிர்கிறார் ‘வடக்குப்பட்டி ராமசாமி’ படத்தின் இயக்குநர் கார்த்திக் யோகி.

”ரொம்ப நல்ல மனிதர். ‘வடக்குப்பட்டி ராமசாமி’யில் பரதநாட்டியம் சீன் ஷூட் பண்ணும் போது அவருக்கு 45 வயதுதான் இருக்கும்னு நினைச்சேன். ‘ஆடுறீங்களா’ன்னு கேட்டேன். ‘அதுக்கென்ன, ஆடிட்டாப் போச்சு’ன்னு சொல்லி அசத்தலா ஆடினார். அவர் மருத்துவமனையில் அட்மிட் ஆன போதுதான் அவருக்கு 60 வயது என்கிற விஷயமே தெரியும்.

சேஷூ அண்ணாவுக்கு காமெடி சென்ஸ் அவ்ளோ அதிகம். அவர் பேசுற டயலாக் எல்லாம் அவ்ளோ காமெடியா இருக்கும். மத்த காமெடி நடிகர்கள்னா, ஒருவரி பன்ச் மாதிரி பேசிட்டுப் போயிடுவாங்க. ஆனா, சேஷூ அண்ணா அதையெல்லாம் பாடிலாங்குவேஜ் காமெடியா பண்ணி அசத்துவார். ஞாபக சக்தி அவருக்கு நிறைய உண்டு. எதையும் மறக்காமல், விட்டுப்போகாமல் சொல்லி அசத்துவார். அவரது பலம் என்னன்னு சந்தானம் சாருக்கு நல்லா தெரியும். அவங்க ரெண்டு பேருமே ஆரம்பக்காலம் முதல் நண்பர்கள்ங்கிறதனால, சந்தானம் சார், ‘மாம்ஸ்’னு தான் அவரைக் கூப்பிடுவார். அதைப் போல சேஷூவும் அவரை ‘என்ன சந்தானம்’னு உரிமையா அன்பா பேசிப்பாங்க. ‘வடக்குப்பட்டி ராமசாமி’யில் குடிகாரன் கேரக்டரை முதல்ல மாறனுக்குத்தான் எழுதியிருந்தேன். சந்தானம் சார்தான் ‘குடிகாரன் கேரக்டர்’ சேஷூ பண்ணட்டும்னார். அவருக்கு இவரோட ப்ளஸ் தெரியும்.

ஸ்பாட்டுல சின்னச் சின்ன ஆர்ட்டிஸ்ட்கள் நிறைய பேரை நடிக்க வைக்கச் சொல்லிக் கேட்பார். ‘கார்த்தி, அவங்களுக்கும் ஒரு ரெண்டு நாள் வொர்க் குடு. எதாவது நடிக்க வச்சிடு… அவங்க வீட்டுலேயும் அடுப்பு எரியட்டும். வயிறார சாப்பிடட்டும்’னு இவர் வாய்ப்புக் கேட்டு அவங்களை நடிக்க வச்சு, அழகு பார்ப்பார். அப்படி ஒரு தங்க மனசுக்காரர் அவர்.