தேர்தல் தேதி அறிவிப்பால் கல்கி 2898 எடி ரிலீஸுக்கு சிக்கல்

தேர்தல் தேதி அறிவிப்பால் ‘கல்கி 2898 எடி’ ரிலீஸுக்கு சிக்கல்

17 மார், 2024 – 11:49 IST

நாக் அஷ்வின் இயக்கத்தில், பிரபாஸ், தீபிகா படுகோனே, அமிதாப்பச்சன் , திஷா பதானி ஆகியோருடன் கமல்ஹாசன் நடிக்கும் படம் ‘கல்கி 2898 எடி’. இப்படம் மே மாதம் 9ம் தேதி வெளியாகும் என ஜனவரி 12ம் தேதியே அறிவித்துவிட்டார்கள்.

ஆனால், அத்தேதியில் படம் வெளிவருவதில் புதிய சிக்கல் ஏற்பட்டுள்ளது. பார்லிமென்ட் தேர்தலுக்கான தேதிகள் நேற்று அதிகாரப்பூர்வமாக அறிவிக்கப்பட்டது. தெலுங்கானா, ஆந்திர மாநிலங்களின் பார்லிமென்ட் தேர்தல் மே 13ம் தேதியன்றும், ஆந்திர சட்டசபைத் தேர்தலும் அதே தேதியில் நடக்கும் என்றும் அறிவித்துள்ளார்கள். மே 9ம் தேதி தேர்தல் ஜுரம் பரபரப்பான கட்டத்தில் இருக்கும்.

தெலுங்கு மொழி பேசும் மக்களான தெலுங்கானா, ஆந்திர மாநிலங்களில்தான் ‘கல்கி 2898 எடி’ படத்திற்கான வசூல் மிக அதிகமாக இருக்கும். தேர்தல் ஜுரம் இருக்கும் சமயம் படம் வெளியானால் அது படத்தின் வசூலை நிச்சயம் பாதிக்கும். எனவே, படக்குழுவினர் புதிய வெளியீட்டுத் தேதியைத் தேட வேண்டிய சூழல் தற்போது ஏற்பட்டுள்ளது. இதனால் மற்ற படங்களின் வெளியீடுகளுக்கும் சிக்கல் வரலாம்.