மார்க் ஆண்டனி விமர்சனம்: `என்னடா மேஜிக் பண்றீங்க?’ மிரட்டல் எஸ்.ஜே.சூர்யாவும் ஜாலியான டைம்டிராவலும்! | Mark Antony Review: A fun filled no brainer time travel movie relying on SJ Suryah

இரு டான்களுக்கு இடையிலான நட்பு, மோதல், நம்பிக்கை துரோகம், மகன் பாசம் போன்றவற்றை ஒரு டைம் டிராவல் கான்செப்ட்டை வைத்து, ரகளையாகச் சொல்லியிருக்கிறார் இயக்குநர். நிகழ்காலத்தைக் காட்டும் (1995) முதற்பாதியின் தொடக்கம் நிதானமாக நகர்வதோடு, படத்திற்கான ‘மூட்’-ஐ செட் செய்யவும், பின்னால் வரப்போகிற லாஜிக் இல்லாத திரைக்கதையையும் அந்த உலகத்தையும் நமக்குப் பழக்கவும் உதவியிருக்கிறது. ஆனாலும், பின்கதையில் வரவுள்ள ‘யார் நல்லவர்? யார் கெட்டவர்?’ என்ற ‘ரகசியம்’ ஒரு தமிழ் சினிமா ரசிகராக நமக்கு முன்னமே தெரிந்து விடுவதால் ட்விஸ்ட் என்று வருவதில் சுவாரஸ்யம் எதுவுமில்லை.

கேங்ஸ்டர், ஃபேன்டஸி, காமெடி என எல்லா ஜானரையும் கலந்துகட்டி ஓடுகிறது திரைக்கதை. அதனால் சுமாரான காட்சிகளைக்கூட காமெடியோ, ஆக்‌ஷனோ, எஸ்.ஜே.சூர்யாவின் மேஜிக்கோ கரை சேர்த்து விடுகிறது. பல காட்சிகளில் கைத்தட்டலையும் எஸ்.ஜே.சூர்யாவே அள்ளிவிடுகிறார். குறிப்பாக அப்பா – மகன், இரண்டு எஸ்.ஜே.சூர்யாக்களும் போனில் பேசிக்கொள்ளும் காட்சிகள் சரவெடி டப்பாசு!