"நான் தற்கொலை செய்துகொண்டால் இன்சூரன்ஸ் பணம் கிடைக்கும் என்று நினைத்தேன்!" – ‘Breaking Bad’ நடிகர்

அமெரிக்க நடிகரான ஜியான்கார்லோ எஸ்போசிட்டோ (Giancarlo Esposito), தொலைக்காட்சித் தொடர்கள், வெப்சீரிஸ், திரைப்படங்கள் எனப் பல்வேறு படைப்புகளில் நடித்து உலக ரசிகர்களின் கவனம் ஈர்த்தவர்.

‘Mike Giardello’, ‘Once Upon a Time’, ‘Revolution’, ‘Do the Right Thing’,  ‘Mo’ Better Blues’, ‘Malcolm X’, ‘The Jungle Book’ போன்ற திரைப்படங்கள் மூலம் பிரபலமானவர். இவரது திரைத்துறை கரியரில் ஒரு திருப்புமுனையாக அமைந்தத் தொடர் ‘Breaking Bad’. இந்த டிவி தொடரில் இவர் நடித்த ‘கஸ்டாவோ ஃப்ரிங்’ கதாபாத்திரம் ஜியான்கார்லோவை உலகம் முழுவதும் கொண்டு சேர்த்தது. கச்சிதமாக அமைந்த இந்த வில்லன் கதாபாத்திரத்திற்குப் பிறகு அவருக்கு, பல திரைப்படங்களின் வாய்ப்புகள் குவிந்தன. அதன் பிறகு அவர் நடித்த ‘The Mandalorian’, ‘The Boys’ போன்ற தொடர்களெல்லாம் ஹிட்டாக அமைந்தன.

இந்நிலையில் ‘Breaking Bad’ தொடர் குறித்து சமீபத்திய நேர்காணல் ஒன்றில் பேசியிருக்கும் ஜியான்கார்லோ எஸ்போசிட்டோ, ‘Breaking Bad’ தொடருக்கு முன்பு தான் மிகுந்த பொருளாதார சிக்கலில் இருந்ததாகவும், அந்த நேரத்தில் தற்கொலை செய்துகொள்ளும் அளவிற்கு அவர் சென்றதாகவும் மனம் திறந்து பேசியுள்ளார்.

இது குறித்து பேசிய அவர், “2008ம் ஆண்டில் ‘Breaking Bad’-ல் நடிப்பதற்கு முன் நான் மிகுந்த பொருளாதார சிக்கலில் மாட்டிக் கொண்டேன். அது எந்த அளவிற்கு என்னைச் சிந்திக்க வைத்தது என்றால், ‘எனக்கு நான்கு குழந்தைகள் இருக்கின்றனர். ஒருவேளை நான் தற்கொலை செய்து கொண்டாலோ அல்லது இறந்துவிட்டாலோ இன்சூரன்ஸ் பணம் வரும். அதை வைத்து என் குழந்தைகள் நல்லபடியாக வாழ்வார்கள்’ என்று நினைத்தேன். அந்தச் சமயத்தில் எனக்குத் தற்கொலை எண்ணங்கள் நிறைய வந்தது. என்னை நானே அழித்துக் கொள்ளும் அளவிற்குச் சென்றேன். 

ஆனால், நான் இல்லை என்றால் என் குழந்தைகள் வாழ்நாள் முழுவதும் வலியுடன் இருப்பார்கள், மிகுந்த கஷ்டத்திற்குள்ளாவார்கள் என்று எனக்குள் ஆழமான சிந்தணை தோன்றியது. எனக்கு என்ன செய்வதென்றே தெரியவில்லை. அந்த இருள் சூழ்ந்த சமயத்தில் ஒளியாக வந்ததுதான் ‘Breaking Bad’ வாய்ப்பு…” என்று மனம் திறந்து பேசியிருக்கிறார்.

Source link