Aavesham Review: பெங்களூரு கேங்ஸ்டர் பகத் பாசிலின் ஒன்மேன் ஷோ… ஆனால் அது மட்டுமே போதுமானதா? | Aavesham Review: Fahadh Faasil impresses in this one man gangster show

அந்த இளைஞர்கள் மேல் அவர் பாசம் வைப்பதற்கான காரணத்தையேனும் இன்னும் அழுத்தமாகச் சொல்லியிருக்கலாம். மேம்போக்கான காட்சிகளும், உணர்வுகளும் கூட பகத் பாசிலால் மட்டுமே பார்வையாளர்களுக்குப் பதிய வைக்கப்படுகின்றன. அவரும் தன் பங்கிற்கு அட்டகாசம் செய்திருக்கிறார் என்றாலும், பிடிப்பில்லாமல் ஓடும் திரைக்கதையை பகத் பாசிலின் இருப்பு ஓரளவிற்குத்தான் காப்பாற்றுகிறது. மேலும், அவருக்கு நிகரான வில்லன் கதாபாத்திரமாக மன்சூர் அலிகான் கட்டமைக்கப்படவில்லை என்பதால், இவர்களுக்கு இடையிலான மோதல் அத்தனை சுவாரஸ்யமானதாக மாறவில்லை.

‘Dumb Charades’ விளையாட்டு, ரங்கனின் உண்மை முகத்தை மூன்று நண்பர்கள் அறியும் இடம், கே.ஜி.எஃப் பாடலை பயன்படுத்திய விதம் என சில ஐடியாக்களும், காட்சிகளும் இரண்டாம் பாதிக்குக் கைகொடுத்திருக்கின்றன. க்ளைமாக்ஸை முன்பே நாம் யூகிக்க முடிந்தாலும், இறுதிக்காட்சி தொகுப்பில் பரபரப்பையும், சுவாரஸ்யத்தையும் பகத்தின் நடிப்பும், தொழில்நுட்ப குழுவும் கொண்டுவந்திருக்கின்றன. கல்லூரியில் எங்குப் பார்த்தாலும் சண்டை, ஊரில் எங்குப் பார்த்தாலும் குடி, துப்பாக்கி மோதல் என நடக்கும் இந்த பெங்களூரு, எந்த காவல்துறையின் கண்ணிலும் படவில்லையா என்ற கேள்வியும் எட்டிப் பார்க்கிறது.