சமீபத்தில் சமூக வலைதளங்களில் பரவலாக அடிபடும் பெயர் அவந்திகா வந்தனாபு.
குழந்தை நட்சத்திரமாக தெலுங்கில் படங்களிலும் விளம்பரங்களிலும் நடித்து தற்போது ஹாலிவுட்டில் கலக்கி வருகிறார் அவந்திகா. 18 வயதான இவர் தற்போது சமூக ஊடகங்களில் பரவலாக பேசப்பட்டு வருகிறார். அவந்திகா நடித்த “அம்மா சமைச்சது மிஸ் லைட்டாதான் இருக்கும்” என்ற பிரபலமான வரியுடன் வரும் எண்ணெய் விளம்பரத்தில் நடித்த அவந்திகா வந்தனபுவின் சமீபத்திய படங்கள் மற்றும் வீடியோக்கள் இணையத்தில் பெரும் புயலைக் கிளப்பி இருக்கிறது.
அமெரிக்காவின் கலிபோர்னியாவில் உள்ள சான்பிரான்சிஸ்கோவில் வசிந்து வந்த ஹைதராபாத் தெலுங்கு குடும்பத்தில் பிறந்தவர் அவந்திகா வந்தனாபு. தனது குழந்தைப் பருவத்தை தெலுங்கானாவில் கழித்தார். சிறு வயதிலிருந்தே குச்சிபுடி மற்றும் பரத நாட்டியத்தில் பயிற்சி பெற்ற இவர், ‘ஜீ தெலுங்கு’ தொலைக்காட்சி வட அமெரிக்காவில் நடத்திய ‘டான்ஸ் இந்தியா டான்ஸ் லிட்டில் ஸ்டார்ஸ்’ என்ற ரியாலிட்டி ஷோவில் இரண்டாவது பரிசை வென்றதன் மூலம் தனக்கான அங்கீகரித்தை பெற்றார்.
அடுத்த சில ஆண்டுகளில், நாக சைதன்யாவின் ‘பிரேமம்’, ‘ராரண்டோய் வேடுக சுதம்’ மற்றும் பவன் கல்யாணின் ‘அக்னியாதவாசி’ போன்ற பல தெலுங்கு படங்களில் நடித்தார். அதுமட்டுமல்லாமல் 2021ஆம் ஆண்டு, ஐஸ்வர்யா ராஜேஷ் நடித்த ’பூமிகா’ படத்தின் மூலம் தமிழில் அறிமுகமானார். தற்போது 17க்கும் மேற்பட்ட படங்களில் நடித்துள்ளார் அவந்திகா.
2021ஆம் ஆண்டு டிஸ்னி சேனல் நிறுவனம் தயாரித்த ‘ஸ்பின்’ திரைப்படம் மூலம் ஹாலிவுட் அறிமுகமானார் அவந்திகா. பிறகு, 2022ஆம் ஆண்டு நகைச்சுவைத் திரைப்படமான சீனியர் இயர் என்ற படத்தில், ரெபெல் வில்சன், மேரி ஹாலண்ட், சாம் ரிச்சர்ட்சன் போன்ற முன்னணி நடிகர்களுடன் நடித்தார். கடந்த மாதம் வெளியான ‘Mean Girls’ படத்திலும் நடித்துள்ளார்.
‘Mean Girls’ படம் தொடர்பான நேர்காணல் ஒன்றில் பேசிய அவர், “ஹாலிவுட்டில் நடிப்பது எனக்கு மிகவும் பிடித்திருக்கிறது. இது போன்ற கதாபாத்திரங்களை தேர்வு செய்து நடிக்க விரும்புகிறேன். தெற்காசியாவில் இருந்து வந்தால் ஹாலிவுட்டில் சாதிக்க முடியாது என்ற பிம்பம் இருக்கிறது. அது போன்ற ஸ்டீரியோடைப்புகளை உடைக்க விரும்புகிறேன்” தெரிவித்திருக்கிறார்.
ஹாலிவுட்டில் முத்திரை பதித்த தெற்காசிய திறமைசாலிகளின் பட்டியலில், இமான் வெல்லானி, ஜெரால்டின் விஸ்வநாதன், மைத்ரேயி ராமகிருஷ்ணன், ரிச்சா மூர்ஜனி, மேகன் சூரி, சரித்ரா சந்திரன் போன்றோர் பட்டியலில் அவந்திகாவும் சேர்ந்திருக்கிறார். அவந்திகா வந்தனாபு தெலுங்கில் குழந்தை நட்சத்திரமாக அறிமுகமாகி ஹாலிவுட்டில் நடிகராக வளம் வருவதை சமூக வலைதளங்களில் பலரும் பாராட்டி வருகின்றனர்.
+ There are no comments
Add yours