Bigg Boss 7 Day 59: `பொளீர்… பொளீர்ன்னு அடிச்சு ஆடுவேன்!’ விஷ்ணுவின் சண்டை; வினோத ராஜா டாஸ்க்|Bigg Boss 7 Day 59 Highlights

ஆரம்பித்தது ராஜாங்க டாஸ்க்

ராஜாங்கம் என்றொரு வீக்லி டாஸ்க்கை ஆரம்பித்தார் பிக் பாஸ். போட்டியில் வெல்பவர் சிறிது நேரத்திற்கு வீட்டின் ராஜாவாக இருக்கலாம். இதில் ஐந்து விதமான பாத்திரங்கள் உண்டு. சர்வாதிகாரி, மக்கு ராஜா, ரொமான்டிக் ராஜா, ஒருதலைப்பட்ச ராஜா, 25-ம் புலிகேசி இம்சை ராஜா. இதில் எதில் வேண்டுமோ, போட்டியில் வெல்பவர் தேர்வு செய்து கொள்ளலாம். சிறந்த ராஜாவிற்கும் ஒரு சப்போர்ட்டிங் கேரக்ட்டருக்கும் ஸ்டார் கிடைக்கும்.

சிறப்பு விருந்தினராக வந்திருந்த ஹரிஷ், ‘யாருக்கு ஸ்டார் தரலாம்’ என்பதை முடிவு செய்த போது பொத்தாம் பொதுவாக ‘ஸ்மால் பிக் பாஸ் ஹவுஸிற்கு’ என்று தந்து சென்று விட்டார். யாராவது ஒருவரைத் தேர்வு செய்து அவர் அளித்திருக்கலாம். இப்போது அந்த ஸ்டார் யாருக்கு என்பதில் சின்ன வீட்டில் குடுமிப்பிடிச் சண்டை ஆரம்பித்தது. ‘டாஸ்க் ஜெயிச்சதுக்குத்தான் ஹரிஷ் கொடுத்தாரு. எனக்கு ஸ்டார்லாம் தேவையில்ல. பூர்ணிமாவிற்கு தரலாம்” என்று ரொமான்டிக் ராஜா மூடில் சிபாரிசு செய்தார் விஷ்ணு. “நான், சுரேஷ், நிக்சன் ஆகிய மூணு பேரும்தான் எண்டர்டெயின்மென்ட் பண்ணி கெஸ்ட்டை எங்கேஜ் செய்தோம். எங்கள்ல ஒருத்தருக்குத்தான் தரணும்” என்றார் அர்ச்சனா.

‘மணிக்கு ஏற்கெனவே மூணு ஸ்டார் இருக்கு. அதை ஈக்வல் பண்றதுக்காக விஷ்ணுவிற்குத் தரலாம்” என்றார் ரொமான்டிக் ராணி மூடில் இருந்த பூர்ணிமா. ‘டாஸ்க்லாம் எண்டர்டெயின்மென்ட்ல வராது” என்று குறுக்கே கட்டையைப் போட்டார் அர்ச்சனா. கடைசியில் விஷ்ணுவிற்கு தரப்படுவதாக மெஜாரிட்டியில் முடிவானது. ‘யார் வேண்டாம்’ என்று சொன்னாரோ அவருக்கே வந்து சேர்ந்தது. இதுவும் விஷ்ணுவின் ஸ்ட்ராட்டஜியோ என்னவோ.

மற்றவர்கள் யாருக்காவது ஸ்டார் கிடைத்திருந்தால் கூட அர்ச்சனா சும்மா இருந்திருப்பார். ஜென்ம விரோதியான விஷ்ணுவிற்கு கிடைத்ததால் கோபமான அர்ச்சனா, வெளியில் வந்து “மணிக்கு மூணு ஸ்டார் இருக்காம். அதனால விஷ்ணுவிற்கு கொடுக்கறாங்களாம். இதுக்கு எதுக்கு மீட்டிங். இவங்களே முடிவு பண்ணிக்கலாமே” என்று உள்ரகசியத்தை பூசணிக்காய் போல் பொதுவில் போட்டு உடைத்தார். ‘என் கருத்தை யாருமே காதுல கேட்டுக்கலை. சுவத்து கிட்ட பேசின மாதிரி இருக்கு’ என்பது அர்ச்சனாவின் ஆதங்கம்.