டிவி ஏரியா முழுக்க இப்போது விஜய் டிவியின் ‘பிக் பாஸ் சீசன் 7 ஜுரம்தான். வரும் அக்டோபர் முதல் வாரத்திலிருந்து நிகழ்ச்சி தொடங்கலாமென எதிர்பார்க்கப்படுகிற நிலையில், நிகழ்ச்சிக்கான புரொமோ கடந்த சில தினங்களுக்கு முன் வெளியானது.
முந்தைய சீசன்களைப் போல வழக்கமான நிகழ்ச்சியாக இல்லாமல் இந்த ஆண்டு நிகழ்ச்சியில் இரண்டு பிக் பாஸ் வீடுகள் என புரொமோவிலேயே அறிவித்துவிட்டனர்.
கூடவே சேனல் தரப்பிலிருந்து, ‘ரெண்டு வீடா, அப்படின்னா ஒரு வீடு முழுக்க பொண்ணுங்களும் இன்னொரு வீட்டில் பசங்களுமா தனித்தனியா பிரிச்சிடுவீங்களா… ஒரு க்ளூ கொடுத்தா பிரிச்சு மேய்ஞ்சிருவீங்களே’ என சோஷியல் மீடியாவில் கிச்சுகிச்சு மூட்ட, அந்த இரண்டாவது வீடு எப்படி இருக்குமென விசாரித்த போது அது பேய் வீடு என்றார்கள்.
‘’வழக்கமான பிக் பாஸ் வீடு ஏசி, விலை உயர்ந்த சோபா செட், கட்டில் மெத்தை என பிரமாதமாக இருக்கும். அதுல எந்த மாற்றமும் இருக்காது. ஆனா அந்த ரெண்டாவது வீடு வசதி குறைவானதா இருக்கும்னு சொல்லப்படுது. அங்க வந்து படுக்க கட்டில் மெத்தை, ஏசி வசதியெல்லாம் இருக்காது போல. ஏன் உட்காரச் சேர் கூட வச்சிருப்பாங்களானு தெரியலை’ என்கிறார்கள்.
முந்தைய சீசன்களில் பிக் பாஸ் வீட்டில் விதிகளை ஃபாலோ செய்யாதவர்கள், சக போட்டியாளர்களுடன் சண்டை பிடிக்கிறவர்களை ஜெயில் அல்லது கார்டன் ஏரியாவில் தங்க வைப்பார்களே, கிட்டத்தட்ட அந்த மாதிரியான ஒரு இடமாகவே அந்த வீடு இருக்கலாமெனத் தெரிய வருகிறது. அந்த வீட்டை ஒரு பாழடைந்த வீடு மாதிரி காட்டி அங்கு ஒரு அமானுஷ்ய குரல் கேட்கிற மாதிரி செய்ய இருப்பதாகவும் ஒரு தகவல்.
இந்நிலையில் இந்த வருட ஏழாவது சீசனுக்கான போட்டியாளர்கள் தேர்வு கிட்டத்தட்ட முடிவடைந்து விட்டதாக நம்பகமான சோர்ஸ் தெரிவிக்கிறது.
நிகழ்ச்சியில் கலந்து கொள்ளத் தேர்வான போட்டியாளர்களை சில தினங்களுக்கு முன் சென்னை கிண்டி பகுதியிலுள்ள நட்சத்திர ஓட்டல் ஒன்றிற்கு வரவழைத்த நிகழ்ச்சி ஏற்பாட்டாளர்கள் அங்கு அவர்களுக்கு நிகழ்ச்சி குறித்தும் அதற்குத் தயாராவது குறித்தும் சில முக்கியமான டிப்ஸ்களை வழங்கியதாகத் தெரிகிறது.
தொடர்ந்து வரும் வாரங்களில் போட்டியாளர்களின் இடங்களுக்குச் சென்று ஆடியோ விஷுவல் எடுப்பது போன்ற நடைமுறைகள் இருக்குமாம்.
கடந்த பிக் பாஸ் சீசன்களின் போது, கலந்து கொள்ளும் போட்டியாளர்கள் குறித்த விபரங்கள் முன்கூட்டியே சமூக வலைதளங்களில் வெளியானதால் இந்த முறை அப்படி எதுவும் நடந்து விடாமலிருக்க கண்காணிப்பை ரொம்பவே அதிகப்படுத்தியிருக்கிறார்களாம்.
இருந்த போதும் பிக் பாஸ் சீசன் 7க்கான புரொமோ ஷூட் நடந்த மறுநாளே நாம் அந்தத் தகவலை வெளியிட்டிருந்தோம். மேலும் இந்த சீசனில் இரண்டு வீடுகள் என்கிற தகவலும் நிகழ்ச்சியின் ப்ரொமோ வெளியாவதற்கு முன்பே விகடன் தளத்தில் வெளியானது நினைவிருக்கலாம்.
பிக் பாஸ் சீசன் 7 ல் கலந்து கொள்ள வாய்ப்பிருப்பதாக டான்ஸ் மாஸ்டர் ஶ்ரீதர், தொகுப்பாளார் ஜாக்குலின், நடிகர் தினேஷ், பப்லு உள்ளிட்ட சிலரது பெயர்களை நாமும் சில தினங்களுக்கு முன் வெளியிட்டிருந்தோம்.
அந்த வரிசையில் லேட்டஸ்ட்டாக கடைசி நேரத்தில் பிக் பாஸ் போட்டியாளர்கள் பட்டியலில் இடம் பிடித்திருப்பதாக ஒருவர் பற்றியத் தகவலும் நமக்குக் கிடைத்துள்ளது. அவர் ரவீனா தாஹா.
‘ஆரம்பத்தில் சன் டிவியில் ‘தங்கம்’ தொடரிலும் பிறகு ஜீ தமிழில் ‘பூவே பூச்சூடவா’ தொடரிலும் நடித்த ரவீனாவுக்கு விஜய் டிவியின் குக்கு வித் கோமாளி நல்ல ரீச்சைத் தந்தது. தொடர்ந்து சினிமாவிலும் தலைகாட்டி வருகிற ரவீனா இன்ஸ்டாகிராமிலும் படு ஆக்டிவாக இருந்து வருகிறார்.
‘பாவம்ப்பா சின்னப் பொண்ணு, பேய் வீட்டுக்கு அனுப்பி புள்ளக்குப் பேய் பிடிக்க வச்சிடாதீங்கப்பா’ என இப்போதே ரவீனாவின் ரசிகர்கள் அலப்பறையைத் தொடங்கி விட்டார்கள்.
பிக் பாஸ் சீசன் 7 நிகழ்ச்சியில் பங்கேற்க வாய்ப்புள்ளவர்களாக நீங்கள் நினைக்கும் பிரபலங்களின் பெயர்களைக் கமென்ட்டில் பதிவிடுங்கள்!
+ There are no comments
Add yours