Salman Khan buys bulletproof foreign car as serial threat echoes

4/9/2023 12:41:00 AM

மும்பை: தனது உயிருக்கு கடும் அச்சுறுத்தல் ஏற்பட்டுள்ளதை தொடர்ந்து, பாலிவுட் முன்னணி நடிகர் சல்மான் கான், வெளிநாட்டில் இருந்து குண்டு துளைக்காத கார் ஒன்றை இறக்குமதி செய்துள்ளார்.
சல்மான் கானுக்கு டெல்லியைச் சேர்ந்த லாரன்ஸ் பிஷ்னோயிடம் இருந்து அடிக்கடி கொலை மிரட்டல் வந்தது. தற்போது லாரன்ஸ் பிஷ்னோய் டெல்லி திகார் சிறையில் இருந்தாலும், தனது அடியாட்கள் மூலம் சல்மான் கானை கொலை செய்ய முயற்சித்துள்ளார். தொடர்ந்து சல்மான் கானுக்கு 4 முறை கொலை மிரட்டல் வந்துள்ளதாம். இதையடுத்து சல்மான் கானுக்கு மும்பை போலீசார் பாதுகாப்பை அதிகரித்துள்ளனர். அவர் வெளியிடங்களுக்கும், சினிமா நிகழ்ச்சிகளுக்கும் செல்லும்போது பலத்த பாதுகாப்பு வழங்கப்பட்டுள்ளது. ஏற்கனவே சல்மான் கான் குண்டு துளைக்காத டொயாட்டோ கார் பயன்படுத்தி வருகிறார். இதை அவர் சமீபத்தில் வாங்கினார். அந்த காரில் அதிநவீன தொழில்நுட்ப வசதிகள் இல்லை என்பதால், தற்போது அதைவிட அதிக தொழில்நுட்ப வசதி கொண்ட குண்டு துளைக்காத நிஸ்ஸான் காரை சல்மான் கான் இறக்குமதி செய்துள்ளார்.

இந்த கார் இன்னும் இந்தியாவில் விற்பனைக்கு வரவில்லை. வளைகுடா நாடுகளில் மிகவும் பிரபலமான இந்த காரையே சல்மான் கான் இறக்குமதி செய்துள்ளார். இது அதிக பாதுகாப்பு மற்றும் அதிக விலை கொண்டது. ஒரு தனியார் நிறுவனம் மூலம் இந்த காரை அவர் இறக்குமதி செய்துள்ளார். புதிய காரில் முகேஷ் அம்பானி மனைவி நீதா அம்பானியின் கலாச்சார மைய திறப்பு விழாவுக்கு சல்மான் கான் சென்றிருந்தார். அப்போது ஐஸ்வர்யா ராய் உள்பட முக்கிய நட்சத்திரங்களுடன் அவர் போட்டோ எடுத்துக்கொண்டார். ஏற்கனவே சல்மான் கானிடம் பல ஆடம்பர கார்கள் உள்ளன. அனைத்து கார்களிலும் குண்டு துளைக்காத கண்ணாடியை சல்மான் கான் பொருத்தி இருக்கிறார். அவரது பண்ணை வீட்டுக்கும் பலத்த போலீஸ் பாதுகாப்பு போடப்பட்டுள்ளது.