Viduthalai Part 1 Review: அதிகாரத்தைக் கேள்வி கேட்கும் ஒரு ராவான ரியலிச சினிமா! ஆனால், சிக்கல் என்ன? | Viduthalai Part 1 Review: A raw and gut wrenching tale on Police proceedings with minor setbacks

காவல் அதிகாரியாக வரும் சேத்தன் ஆணவம், கோபம், அதிகாரத் திமிர் போன்றவற்றைச் சிறப்பாக வெளிப்படுத்தி நம் வெறுப்பைச் சம்பாதித்துக் கொள்கிறார். கௌதம் மேனன், கௌதம் மேனனாகவே தோன்றும் மற்றொரு படம் இது. அவரின் குழப்பமான கதாபாத்திர வரைவைத் தாண்டி, எல்லாப் படங்களிலும் அவரது நடிப்பும் ஒரே பரிமாணமாகவே வெளிப்படுவதும் சிக்கலே! நியாயமான அதிகாரியாக, அதே சமயம் சிஸ்டத்தில் சிக்குண்டு, முடிந்தளவு நல்லது செய்ய நினைக்கும் வேடத்தில் ‘டாணாக்காரன்’ இயக்குநர் தமிழ் ஈர்க்கிறார். மூணார் ரவி, ராஜீவ் மேனன், சந்திரன் எனச் சிறிய பாத்திரங்களில் தோன்றுபவர்களும் தேவையான பங்களிப்பை அளித்திருக்கிறார்கள்.

அதிகாரத்துக்கு எதிராகப் போராடுவதற்காக ஓர் இயக்கமாக ஒன்று திரள்பவர்களும் அதே வன்முறை பாதையைக் கையில் எடுக்கின்றனர். அதற்கு நியாயம் சேர்க்கும் தொனி படத்தில் ஆங்காங்கே வெளிப்பட்டாலும் இரண்டாம் பாகத்தில் அதற்கான பின்னணியும் காரணங்களும் விளக்கப்பட்டிருக்கும் என்பதைக் கடைசியில் வரும் டிரெய்லர் காட்சிகளின் மூலம் புரிந்துகொள்ள முடிகிறது. ஆனாலும் ஒரு தனிப்படமாகப் பார்க்கும்போது, சில இடங்களில் போலீஸின் பக்கம் படம் நிற்பதுபோன்ற ஓர் ஆபத்தும் இருக்கவே செய்கிறது.