தெலுங்கில் நடிக்கும் சூர்யா – Dinakaran Cinema News

3/6/2023 4:44:24 PM

சிவா இயக்கும் 3டி படத்தில் நடித்து வருகிறார், சூர்யா. இது அவர் நடிக்கும் 42வது படம். தலைப்பு முடிவாகவில்லை. சரித்திரக்கதை கொண்ட இப்படம் 10 மொழிகளில் உருவாகிறது. பாலிவுட் நடிகை திஷா பதானி, யோகி பாபு, ரெடின் கிங்ஸ்லி, கோவை சரளா, ஆனந்தராஜ் நடிக்கின்றனர். இதையடுத்து சூர்யா நடிக்கும் படம், ‘வாடிவாசல்’. வெற்றிமாறன் இயக்குகிறார். ஜல்லிக்கட்டை மையப்படுத்திய இப்படத்தில் சூர்யா இரட்டை வேடத்தில் நடிக்கிறார். இந்நிலையில், நேரடி தெலுங்கு படத்தில் சூர்யா நடிக்க முடிவு செய்துள்ளதாக தகவல் கிடைத்துள்ளது.

கடந்த ஆண்டு துல்கர் சல்மான் நடிப்பில் வெளியான ‘சீதா ராமம்’ படத்தை இயக்கிய ஹனு ராகவபுடி, சூர்யாவை சந்தித்து கதை சொல்லியிருக்கிறார். இக்கதை சூர்யாவுக்குப் பிடித்துவிட்டதால், இப்படத்தை தெலுங்கில் மைத்ரி மூவி மேக்கர்ஸ் தயாரிக்க திட்டமிடப்பட்டுள்ளது. இக்கதையை ராம் சரண், நானி ஆகியோரிடம் ஹனு ராகவபுடி கூறியதாகவும், அவர்கள் வெவ்வேறு படங்களில் பிசியாக இருப்பதால், கடைசியில் இக்கதையில் நடிக்க சூர்யா சம்மதித்ததாகவும் கூறப்படுகிறது. ஏற்கனவே தமிழில் சூர்யா நடித்து வெளியான பல படங்கள், தெலுங்கில் டப்பிங் செய்து வெளியிடப்பட்டு நல்ல வரவேற்பு பெற்றுள்ளன.