குமரி மாவட்டத்தின் Thugs Review: அதிரடி ஆக்ஷன் பிளாக்; ஈர்க்கிறதா இந்த `பிரிசன் பிரேக்’ த்ரில்லர்? | Kumari Mavattathin Thugs: Does this Prison Break thriller impress?

சிறையிலிருந்து தப்பிப்பதற்காக இவர்கள் போடும் திட்டமும் எங்கும் காணாத, கேட்டிராத திட்டமெல்லாம் இல்லை. அதில் இன்னும் சில புத்திசாலித்தனமான விஷயங்களைச் சேர்த்திருக்கலாம். அவ்வப்போது ‘இதெல்லாம் எப்படிச் சாத்தியம்?’ என்ற லாஜிக் கேள்விகளும் எழாமல் இல்லை. இந்தத் திட்டத்தின் இறுதிக்கட்டங்களில் அவசர கதியில் சில கதாபாத்திரங்கள் சேர்க்கப்படுத்துவதும் நம்பும்படியாக இல்லை.

இந்தக் குறைகளைத் தாண்டி நம்மை இருக்கை நுனியில் உட்கார வைப்பது படத்தின் மேக்கிங்தான். ஒளிப்பதிவாளர் ப்ரியேஷ் குருசாமியும், படத்தொகுப்பாளர் பிரவீன் ஆண்டனியும் ஸ்டண்ட் கொரியோகிராபியில் ராஜசேகர் மற்றும் பீனிக்ஸ் பிரபுவும் ஒவ்வொரு காட்சியையும் மேம்படுத்தப் போட்டிப்போட்டு உழைத்திருக்கிறார்கள். அதிகமான இரவுக்காட்சிகள் கொண்ட, பெரும்பாலும் ஒரே இடத்தில் நடக்கும் படத்தில் இவர்களது உழைப்பு பளிச்சிடுகிறது. சண்டைக்காட்சிகள் காட்சிப்படுத்தப்பட்ட விதத்திற்கும் ஸ்பெஷல் பாராட்டுகள்!

படத்திற்கு மற்றொரு முக்கிய ப்ளஸ் சாம்.சி.எஸ்ஸின் இசை. ஆங்காங்கே ஓவர்டோஸ் ஆவது போல் தெரிந்தாலும் திரையிலிருக்கும் பரபரப்பைப் பார்வையாளர்களான நமக்குக் கடத்துவதில் முக்கிய பங்கு அவருடைய பின்னணி இசைக்கு உண்டு. இரண்டாம் பாதியில் திரைக்கதை எங்காவது தேங்கி நிற்கும் போதெல்லாம் படத்தைக் காப்பாற்றுபவர்கள் திரைக்குப் பின் இருக்கும் இவர்கள்தான்.