அனைத்தையும் விட்டுவிட்டு தனிமையில் திக்கற்ற பயணம் என்றால் `சலித்து போனேன் மனிதனாய் இருந்து, பறக்க வேண்டும் பறவையாய் திரிந்து திரிந்து’ என `மூங்கில் காடுகளே’ பாடல், ப்ரியமானவருடனான ஒரு நெடும்பயணம் என்றால் `என்னைக் கொஞ்சம் மாற்றி’ என வாழ்வில் எங்கும் நீக்கமற நிற்கிறது உங்கள் இசை. காதல் எனகிற ஒற்றை சொல் நிகழ்த்துகிற மாயத்தை கச்சிதமாக வெளிக்கொணர இங்கு பாடல்களும் இசையும் தான் பெரும் பங்கெடுத்துக் கொள்கின்றன. அதில் உங்களுக்கும் பெரும்பங்குண்டு. ஒரு தலைக்காதல், காதல் தோல்வி, காதலின் தவிப்பு, காதலர்களின் பயணம், காதலில் திளைப்பது என காதலின் பல படிநிலைகளைப் பாடலாக்கியிருக்கிறீர்கள். காதல், உறவு முறிவுக்குப் பிறகு பதைபதைப்புடன் தோன்றும் அடுத்த காதலை ஏற்கலாமா? மறுக்கலாமா? என்கிற மனநிலையையும் நீங்கள் உங்கள் இசையின் மூலம் மொழிப்படுத்தியிருக்கிறீர்கள். ஒரு பெண் தன் மனதெங்கும் தேக்கி வைத்திருக்கிற சொல்லாத காதலை, அதன் தோல்வியை `யாரோ மனதிலே’ பாடல் வெளிப்படுத்தியிருக்கும் பகிர்ந்திட முடியாத அந்த ரணத்தை,
காற்று வந்து மூங்கில் என்னை…
பாடச் சொல்கின்றதோ…
மூங்கிலுக்குள் வார்த்தை இல்லை…
ஊமை ஆகின்றதோ…
என்ற வரிகளும் உங்கள் இசையும் சேர்ந்து அந்த ரணத்தைக் கடத்தியிருக்கும்.
`மஞ்சள் வெயில் மாலையிலே’ பாடலின் இறுதியில் கமல் விமானம் ஏறும் வரை வரும் உங்களின் பின்னணி இசை ஆணின் தவிப்பையும், `உயிரிலே எனது உயிரிலே’ பாடலின் துவக்கத்தில் வரும் இதயத்துடிப்பு போன்ற இசை பெண் மனதின் பதைபதைப்பையும் அப்படியே பிரதிபலித்தது. `உனக்கென்ன வேணும் சொல்லு!’ பாடலில் தன் மகளை தேசமெங்கும் தூக்கிச் செல்கிற தகப்பனின் வாஞ்சையை அத்தனை அழகாக இசையாக்கியிருப்பீர்கள்.
+ There are no comments
Add yours