ரசவாதி விமர்சனம்: மனநல பிரச்னையைப் பேசும் க்ரைம் கதையில் இத்தனை வாட்ஸ்அப் பார்வேர்டு மெசேஜ்களா? | Rasavathi Review: A sincere crime drama let down by unwanted preachiness

கந்தர்வ குரல், மரங்களின் மீது காருண்யம், எதையும் சாந்தமாக அணுகும் பேச்சு என பேன்ட் சர்ட் போட்ட ஞானியாக அர்ஜுன் தாஸ். தத்துவங்கள் போடும் இடங்களில் நடிப்பு சிறப்பாக இருந்தாலும் உணர்வுபூர்வமான காட்சிகளில் எமோஷன் மிஸ்ஸிங். சண்டைக் காட்சிகளில், கோபமான ஷாட்களில் மட்டும் அந்த நடிப்பில் நம்பகத்தன்மை கூடிவிடுகிறது. நாயகி தான்யா ரவிச்சந்திரன் நடிப்பில் பெரிதாக ஈர்க்கவில்லை. மற்றொரு நாயகியாக இரண்டாம் பாதியில் வந்து போகும் ரேஷ்மா வெங்கடேசன் கொடுக்கப்பட்ட திரை நேரத்தில் சற்றே பாஸ் மார்க் வாங்குகிறார். சிதைவடைந்த மனநிலையில் அனைவரின் மீதும் எரிந்துவிழும் சுஜித் சங்கர், தனது கதாபாத்திரத்துக்கு நியாயம் செய்திருக்கிறார். இருந்தும் ஒரு சில இடங்களில் செயற்கைத்தனம் ஆங்காங்கே எட்டிப்பார்க்கிறது. துணைக் கதாபாத்திரங்களாக வரும் ஜி.எம்.குமார், ரிஷிகாந்த் ஆகியோரின் நடிப்பில் குறையேதுமில்லை. மனநல மருத்துவராக வரும் ரம்யாவின் நடிப்பு ஓவர்டோஸ்!