வெற்றி பெறும் அணிக்கும் வழங்கப்படும் உலகக் கோப்பையின் வரலாறு பற்றி தெரியுமா?

50 ஓவர் உலகக் கோப்பை கிரிக்கெட்டில் சாம்பியன் பட்டம் வென்ற அணிகளின் வரலாறு பற்றி நம்மில் பலர் அறிந்திருப்போம். வாகைசூடும் அணிக்கு வழங்கப்படும் உலகக் கோப்பை குறித்த வரலாற்றை தற்போது பார்க்கலாம்.

எந்த ஒரு விளையாட்டிலும் உச்சபட்ச பரிசாக பார்க்கப்படுவது உலகக் கோப்பை. கிரிக்கெட்டில், ஒருநாள் போட்டிகளுக்கான வெற்றியாளருக்கு வழங்கப்படும் உலகக் கோப்பைக்கு தனி வரலாறே உள்ளது.

ஆரம்பத்தில் உலகக் கோப்பை போட்டிக்கு ஸ்பான்சர் செய்யும் நிறுவனத்தின் பெயரிலேயே சாம்பியன் கோப்பை வழங்கப்பட்டது. உதாரணமாக, 1975, 1979, 1983 என முதல் மூன்று தொடர்களில், பிரிட்டிஷ் காப்பீட்டு நிறுவனமான புருடன்ஷியல் கோப்பை என்ற பெயரில் வழங்கப்பட்டுள்ளது.  அதேபோன்று, 1987ம் ஆண்டு நடைபெற்ற உலகக் கோப்பை தொடரை ரிலையன்ஸ் நிறுவனம் ஸ்பான்ஸர் செய்தது. எனவே ரிலையன்ஸ் உலகக் கோப்பை என்று அழைக்கப்பட்டது.

1992 மற்றும் 96 ஆகிய ஆண்டுகளில் வழங்கப்பட்ட உலகக் கோப்பை பிரிட்டிஷ் சிகரெட் நிறுவனமான பென்சன் மற்றும் வில்ஸ் நிறுவனத்தின் பெயரில் வழங்கப்பட்டது. ஸ்பான்ஸர்களுக்கு ஏற்ப கோப்பையின் வடிவமும் மாறிக் கொண்டே இருந்தது. இதைத் தவிர்ப்பதற்காக 1999ம் ஆண்டு சர்வதேச கிரிக்கெட் கவுன்சில் நிரந்தரமாக ஒரே கோப்பையை வழங்க முடிவு செய்து அதை நடைமுறைபடுத்தியும் வருகிறது.

இங்கிலாந்தின் பிரபல நகை வடிவமைப்பாளரான ஸ்டீவன் ஒட்டிவில் ஒருநாள் கிரிக்கெட் உலகக் கோப்பையை வடிவமைத்தார். அதன்படி இங்கிலாந்தில் உள்ள அவரது நிறுவனமான க்ரவுன் ஸூவல்லர்ஸ் ஃபேக்டரியில் உலகக் கோப்பை தயாரிக்கப்படுகிறது.

தற்போது வழங்கப்பட்டு வரும் உலகக் கோப்பை வெள்ளி மற்றும் தங்கத்தால் தயாரிக்கப்படுகிறது. 60 செ. மீ உயரம் கொண்ட இந்த கோப்பை 11 கிலோ எடையில் உருவாக்கப்பட்டுள்ளது. கிரிக்கெட் பந்தை மூன்று தூண்கள் தாங்கி நிற்பது போல வடிவமைக்கப்பட்டுள்ளது.

உலக உருண்டை கிரிக்கெட் பந்தாகவும், மூன்று தூன்கள் பேட்டிங், பவுலிங், ஃபீல்டிங் என கிரிக்கெட்டின் அடிப்படை அங்கத்தை பிரதிபலிக்கிறது. அடிப்பகுதியில் இதுவரை சாம்பியன் பட்டம் வென்ற அணிகளின் பெயர் மற்றும் ஆண்டுகள் பொறிக்கப்பட்டுள்ளன.

ஒவ்வொரு முறையும் இரண்டு கோப்பை தயாரிக்கப்பட்டு ஒரு கோப்பை நிரந்தரமாக ஐசிசி தலைமை அலுவலகத்தில் வைக்கப்படுகிறது. மற்றொரு கோப்பை சாம்பியன் பட்டம் வெல்லும் அணிக்கு சொந்தமாக வழங்கப்படுகிறது. இதுவரை இந்திய அணி இரண்டு முறை சாம்பியன் கோப்பையை கைப்பற்றியுள்ளது. 1983 புருடன்ஷியல் உலகக் கோப்பை, 2011 ஐசிசி உலகக் கோப்பை என இரண்டு கோப்பைகள் பிசிசிஐ வரவேற்பரையை அலங்கரிக்கிறது.

இதையும் வாசிக்க:  ஒருநாள் கிரிக்கெட் பேட்டிங் தரவரிசை: 2ம் இடத்தை பிடித்த ஷுப்மன் கில்.. டாப் 10-ல் மற்ற இந்தியர்கள் யார்?

தற்போது வழங்கப்பட்டு வரும் உலகக் கோப்பை ஆஸ்திரேலியா, இந்தியா, இங்கிலாந்து என மூன்று நாடுகளில் மட்டுமே உள்ளது.  ஆஸ்திரேலியா நான்கு முறையும் , இந்தியா மற்றும் இங்கிலாந்து தலா ஒரு முறையும் கோப்பையை சொந்தமாக்கியுள்ளனர்.