இன்று கூடுகிறது நாடாளுமன்ற சிறப்பு கூட்டத் தொடர்

பலத்த எதிர்பார்ப்புக்கு மத்தியில் நாடாளுமன்ற சிறப்பு கூட்டத் தொடர், பழைய கட்டடத்திலேயே இன்று தொடங்குகிறது.

நாடாளுமன்ற சிறப்புக் கூட்டத் தொடர் இன்று முதல் வருகின்ற 22 ஆம் தேதி வரை 5 நாட்கள் நடைபெறும் என்று மத்திய அரசு ஏற்கெனவே அறிவித்துள்ளது. இந்தக் கூட்டத்துக்கான நிகழ்ச்சி நிரல் அறிவிக்கப்படாததற்கு காங்கிரஸ் உள்ளிட்ட எதிர்க்கட்சிகள் கடும் கண்டனம் தெரிவித்தன.

இதையடுத்து, நாடாளுமன்ற செய்தி இதழில் இதுகுறித்து விளக்கம் அளிக்கப்பட்டது. அதில், அரசியல் நிர்ணய சபை தொடங்கப்பட்டது முதல் நாடாளுமன்றத்தின் 75 ஆண்டுகால பயணம் வரை இந்தக் கூட்டத் தொடரில் விவாதிக்கப்படும் என தெரிவிக்கப்பட்டது. அத்துடன், தலைமை தேர்தல் ஆணையர் மற்றும் தேர்தல் ஆணையர்கள் நியமனம் தொடர்பான மசோதா மக்களவையில் விவாதிக்கப்பட்டு, நிறைவேற்றப்படும் என எதிர்பார்க்கப்படுகிறது.

மேலும், நாடாளுமன்றம், சட்டப்பேரவைகளில் மகளிருக்கு 33 சதவீத இடஒதுக்கீடு வழங்க வகை செய்யும் மசோதாவும் தாக்கல் செய்யப்படலாம் என்று கூறப்பட்டுள்ளது.

இதையும் படிங்க : இனிய விநாயகர் சதுர்த்தி 2023: நண்பர்களுக்கு பகிர வாழ்த்து அட்டைகள்..!

சிறப்புக் கூட்டத் தொடரின் முதல் நாள் நாடாளுமன்றத்தின் பழைய கட்டடத்திலும், எஞ்சிய 4 நாள் கூட்டங்கள் புதிய கட்டடத்திலும் நடைபெறும் என தெரிவிக்கப்பட்டுள்ளது. இதனிடையே, அவையை சுமூகமாக நடத்துவது தொடர்பாக நேற்று அனைத்துக் கட்சிகள் கூட்டம் நடைபெற்றது.

இதையடுத்து பேசிய நாடாளுமன்ற விவகாரங்கள் துறை அமைச்சர் பிரலாத் ஜோஷி, பழைய நாடாளுமன்ற மைய மண்டபத்தில் நாளை குழு புகைப்படம் எடுக்கப்படும் எனவும், பின்னர் புதிய கட்டடத்திற்கு அனைவரும் செல்வோம் எனவும் கூறினார்.